സ്വാതന്ത്ര്യം ആഘോഷിക്കുന്നത് കുഞ്ഞുങ്ങളുടെ കുഴിമാടത്തിനു മുകളിൽ : എം.ബി.രാജേഷ്

#

(15-08-17) : രാജ്യം 71ാം സ്വാതന്ത്ര്യ ദിനം ആഘോഷിക്കുന്നത് 71 കുഞ്ഞുങ്ങളുടെ കുഴിമാടങ്ങള്‍ക്ക് മുകളിലാണെന്ന് എം.ബി രാജേഷ് എം.പി്. ഫെയ്സ്ബുക്ക്‌പോസ്റ്റിലായിരുന്നു എം.പിയുടെ പ്രതികരണം.

യൂ്പി മുഖ്യമന്ത്രി യോഗി ആദിത്യനാഥിനും പ്രധാനമന്ത്രി നരേന്ദ്രമോദിക്കുമെതിരെ രൂക്ഷമായ വിമര്‍ശനങ്ങളും ഫെയ്സ്ബുക്ക് പോസ്റ്റിലുണ്ട്. 71 പിഞ്ചുകുഞ്ഞുങ്ങളുടെ കുഴിമാടം മൂടുംമുമ്പ് അഭിനവ കംസന്‍ ആദിത്യനാഥിന് ജന്മാഷ്ടമി ആഘോഷിക്കുന്നതിലാണ് താത്പര്യമെന്നും പോസ്റ്റില്‍ പറയുന്നു.  1947 ആഗസ്ത് 14 അര്‍ദ്ധരാത്രിയിലെ പ്രസംഗത്തില്‍ നെഹ്‌റു പറഞ്ഞത് ലോകം മുഴുവന്‍ ഉറങ്ങുമ്പോള്‍ ഇന്ത്യ സ്വാതന്ത്ര്യത്തിലേക്കും ജീവിതത്തിലേക്കും ഉണരുന്നു എന്നാണ്.എന്നാല്‍ ഈ സ്വാതന്ത്ര്യ പുലരിയില്‍ കുഞ്ഞുങ്ങളുടെ കൂട്ടക്കുരുതിയുടെ ദുരന്തവൃത്താന്തങ്ങളിലേക്കും അമ്മമാരുടെ നിലയ്ക്കാത്ത കണ്ണീരിലേക്കുമാണ് രാജ്യം ഉണരുന്നതെന്നും എം ബി രാജേഷ് ഫെയ്‌സ്ബുക്കില്‍ കുറിച്ചു.

എം.ബി.രാജേഷിന്റെ ഫെയ്സ്ബുക്ക് പോസ്റ്റിനെ്‌റ പൂര്‍ണരൂപം

എഴുപത്തൊന്നാം സ്വാതന്ത്ര്യ ദിനംആഘോഷിക്കുന്നത് 71 കുഞ്ഞുങ്ങളുടെ കുഴിമാടങ്ങള്‍ക്ക് മുകളിലാണ്. കണക്കില്‍ എന്തൊരു ക്രൂരമായ യാദൃച്ഛികത ! 1947 ആഗസ്ത് 14 അര്‍ദ്ധരാത്രിയിലെ പ്രസംഗത്തില്‍ നെഹ്‌റു പറഞ്ഞത് ലോകം മുഴുവന്‍ ഉറങ്ങുമ്പോള്‍ ഇന്ത്യ സ്വാതന്ത്ര്യത്തിലേക്കും ജീവിതത്തിലേക്കും ഉണരുന്നു എന്നാണ്. ഈ സ്വാതന്ത്ര്യ പുലരിയില്‍ കുഞ്ഞുങ്ങളുടെ കൂട്ടക്കുരുതിയുടെദുരന്തവൃത്താന്തങ്ങളിലേക്കുംഅമ്മമാരുടെ നിലക്കാത്ത കണ്ണീരിലേക്കുമാണ് രാജ്യം ഉണരുന്നത്.

ഏറ്റവും ഒടുവിലായി, 71 പിഞ്ചുകുഞ്ഞുങ്ങളുടെ കുഴിമാടം മൂടുംമുമ്പ് അഭിനവ കംസന്‍ ആദിത്യനാഥിന്റെ ഉഗ്രശാസനം വന്നിരിക്കുന്നു പോല്‍! ജന്മാഷ്ടമി ഗംഭീരമായി ആഘോഷിക്കണം പോല്‍! യോഗിയുടെ നേതാവ് മോദിക്ക് ഒറ്റ വാചകത്തില്‍ അനുശോചനം പറയാന്‍ പോലും മനസ്സുണ്ടായില്ല. പോര്‍ച്ചുഗലിലെ കാട്ടുതീയും റഷ്യയിലേയും മ്യാന്‍മറിലേയും സൈനിക വിമാനങ്ങളുടെ തകര്‍ച്ചയും തുര്‍ക്കിയിലെ ഭീകരക്രമണവുമെല്ലാം തന്നെ അത്യധികം ദു:ഖിപ്പിച്ചതായി ട്വിറ്ററില്‍ കുറിച്ച ആള്‍ക്ക്, ലതാ മങ്കേഷ്‌ക്കര്‍ക്കും സച്ചിന്‍ ടെന്‍ഡുല്‍ക്കര്‍ക്കും ആണ്ടോടാണ്ട് ഓര്‍ത്തുവച്ച് പിറന്നാള്‍ ആശംസ നേരുന്നയാള്‍ക്ക്, രാഷ്ട്രീയ നാടകവേദികളില്‍ തരാതരം പോലെ ഗദ്ഗദകണ്ഠനാവാനും കരച്ചില്‍ അഭിനയിക്കാനും സമര്‍ത്ഥനായ പ്രധാനമന്ത്രിക്ക് ഈ കുട്ടികള്‍ക്ക് വേണ്ടി പൊഴിക്കാന്‍ ഒരിറ്റ് കണ്ണീരില്ലത്രേ! (ഇനി ഒന്നോ രണ്ടോ ആഴ്ച കഴിഞ്ഞ് ഗത്യന്തരമില്ലാതെ വന്നാല്‍ ഭാരതാംബക്ക് 71 മക്കളെ നഷ്ടപ്പെട്ടു എന്നോ മറ്റോ ഒരു ഡയലോഗ് കാച്ചുമായിരിക്കും)

പിന്നെ, ഈ നേതാക്കളുടെ അണികളെങ്ങനെ ശിശുഹത്യ പശുഹത്യയേക്കാള്‍ ഗൗരവമായിക്കാണും? ക്രൂരമായ ന്യായീകരണക്കസര്‍ത്തുകളാല്‍ മനുഷ്യത്വത്തെ ഇവരെങ്ങനെ നിരന്തരം പരിഹസിക്കാതിരിക്കും? അധികാരത്തിലിരിക്കുന്നവരുടെ ഹൃദയശൂന്യതയാണ് ഗോരഖ്പൂരിലെ കുഞ്ഞുങ്ങളുടെ കൂട്ടക്കുരുതിക്ക് കാരണമെന്നതിന് ഇതില്‍ കൂടുതല്‍ എന്ത് തെളിവ് വേണം? ആ കുരുതിയോ, കുരുന്നുകളുടെ മൃതശരീരം മാറോടടക്കിപ്പിടിച്ച് ഒരാംബുലന്‍സ് പോലുമില്ലാതെ ബൈക്കില്‍ കയറി പോകേണ്ടിവരുന്ന കരള്‍പിളരുന്ന ആ ക്രൂര ദൃശ്യമോ യോഗിയേയോ മോദിയേയോ ഒന്നും ബാധിക്കുന്നതേയില്ല. അത് കണ്ടിട്ടും അവരുടെ ഉള്ള് പിടയുന്നില്ല. വീമ്പടിക്കുന്ന 56 ഇഞ്ചിനുള്ളില്‍ സാധാരണ മനുഷ്യര്‍ക്കുള്ളത് ഇല്ലെന്നതിന് തെളിവ് ഇനിയെന്ത് വേണം?

യു.പി. തെരഞ്ഞെടുപ്പ് പ്രചരണത്തില്‍ മോദിയുടെ വാഗ്ദാനം ഇപ്പോള്‍ ഓര്‍മ്മിക്കേണ്ടതാണ്. മുന്‍സര്‍ക്കാര്‍ ഖബറിസ്ഥാന്‍ മാത്രമേ നല്‍കിയുള്ളൂ ഞങ്ങള്‍ ശ്മശാനം നല്‍കും എന്നായിരുന്നു ആ വാഗ്ദാനം. മോദിയും യോഗിയും കൂടി അതിലേക്കുള്ള ആദ്യചുവട് വച്ചിരിക്കുന്നു. വര്‍ഗ്ഗീയത ആത്യന്തികമായി വാഗ്ദാനം ചെയ്യുന്നത് ശ്മശാനം മാത്രമാണെന്ന തിരിച്ചറിവിന്റെ പാഠം ഗോരഖ്പൂര്‍ ആവര്‍ത്തിച്ചുറപ്പിക്കുന്നു.

വാല്‍ക്കഷണം: ഉത്തരേന്ത്യയിലേക്ക് നോക്കിയിരിക്കുന്നു എന്നാക്ഷേപിക്കുന്ന സംഘികള്‍ പോര്‍ച്ചുഗലും തുര്‍ക്കിയും മ്യാന്‍മറും റഷ്യയുമൊക്കെ കഴിഞ്ഞ് എപ്പോഴെങ്കിലുമൊക്കെ ഇന്ത്യയിലേക്കും തന്റെ മണ്ഡലമുള്‍പ്പെടുന്ന യു.പി.യിലേക്കും നോക്കാന്‍ അമ്പത്താറിഞ്ചനോട് പറഞ്ഞാലും.