സ്ത്രീ അഭിമാനത്തിന്റെ പ്രഖ്യാപനം ; അമ്മയിൽനിന്ന് നടിമാരുടെ കൂട്ടരാജി

#

(27-06-18) : മലയാള നടീനടന്മാരുടെ സംഘടനയായ അമ്മയിൽ നിന്ന് ഭാവന, ഗീതു മോഹൻദാസ്, രമ്യാ നമ്പീശൻ, റീമ കല്ലിങ്കൽ എന്നീ നടിമാർ രാജി വച്ചു. മലയാള സിനിമയിലെ സ്ത്രീ പ്രവർത്തകരുടെ കൂട്ടായ്മയായ വിമൺ ഇൻ സിനിമാ കളക്ടീവിന്റെ ഫെയ്‌സ്ബുക്ക് പേജിലൂടെ നടിമാർ രാജി വിവരം അറിയിക്കുകയായിരുന്നു. അമ്മയിൽനിന്ന് താൻ രാജി വയ്ക്കുകയാണെന്ന് അറിയിക്കുന്ന ഭാവനയുടെ കുറിപ്പിന് താഴെയാണ് മറ്റു നടിമാർ തങ്ങളുടെ രാജി തീരുമാനം വിശദീകരിക്കുന്നത്.

ഭാവനയുടെ വാക്കുകൾ : "അമ്മ എന്ന സംഘടനയിൽ നിന്ന് ഞാൻ രാജിവെക്കുകയാണ്. എനിക്ക് നേരെ നടന്ന ആക്രമണത്തിൽ കുറ്റാരോപിതനായ നടനെ "അമ്മ"യിലേക്ക് തിരിച്ചെടുത്തതു കൊണ്ടല്ല ഈ തീരുമാനം. ഇതിനു മുന്പ് ഈ നടൻ എന്റെ അഭിനയ അവസരങ്ങൾ തട്ടിമാറ്റിയിട്ടുണ്ട്. അന്ന് പരാതിപ്പെട്ടപ്പോൾ ഗൗരവപ്പെട്ട ഒരു നടപടിയും സംഘടന എടുത്തിരുന്നില്ല. ഇത്രയും മോശപ്പെട്ട അനുഭവം എന്റെ ജീവിതത്തിൽ ഈയിടെ ഉണ്ടായപ്പോൾ , ഞാൻ കൂടി അംഗമായ സംഘടന കുറ്റാരോപിതനായ വ്യക്തിയെ സംരക്ഷിക്കാനാണ് കൂടുതൽ ശ്രമിച്ചത്. ഇനിയും ഈ സംഘടനയുടെ ഭാഗമായിരിക്കുന്നതിൽ അർത്ഥമില്ല എന്ന് മനസ്സിലാക്കി ഞാൻ രാജി വെക്കുന്നു."

അവൾക്കൊപ്പം ഞങ്ങളും രാജി വെക്കുന്നു എന്ന ആമുഖത്തോടെയാണ് മറ്റു നടിമാർ രാജി തീരുമാനം അറിയിച്ചത്. മലയാള സിനിമയിലെ നടീനടന്മാരുടെ സംഘടനയായ "അമ്മ" യിൽ നിന്ന് തങ്ങളിൽ ചിലർ രാജി വെക്കുന്നു എന്നറിയിച്ചുകൊണ്ട് അമ്മയ്‌ക്കെതിരെ നിശിതവിമർശനമാണ് രമ്യാ നമ്പീശനും ഗീതുമോഹൻദാസും റീമ കല്ലിങ്കലും ഉന്നയിക്കുന്നത്. സ്ത്രീ സൗഹാർദ്ദപരമായ തൊഴിലിടമായി മലയാള സിനിമാ വ്യവസായത്തെ മാറ്റാനുള്ള ഒരു ശ്രമവും അമ്മ നടത്തിയിട്ടില്ല എന്നു നടിമാർ ഓർമ്മിപ്പിക്കുന്നു. വിമൻ ഇൻ സിനിമാ കളക്ടീവ് അതിനായി നടത്തിയ ശ്രമങ്ങളെ , ഫാൻസ് അസോസിയേഷനുകളുടെ മസിൽ പവറിലൂടേയും തരം താണ ആക്ഷേപഹാസ്യത്തിലൂടെയും പരിഹസിക്കുകയാണ് ചെയ്തിട്ടുള്ളത്.

അമ്മയുടെ അംഗമായ തങ്ങളുടെ സഹപ്രവർത്തകക്ക് നേരെ ഉണ്ടായ അതിക്രമത്തിൽ അമ്മ അംഗവും കുറ്റാരോപിതനുമായ നടനെ പിന്തുണക്കുന്ന നിലപാടാണ് "അമ്മ" സ്വീകരിച്ചതെന്നും കുറ്റാരോപിതനായ നടനെ തിരിച്ചെടുക്കാൻ തീരുമാനിക്കുക വഴി, തങ്ങൾ ആരുടെ പക്ഷത്താണെന്ന് അസന്നിഗ്ദ്ധമായി പ്രഖ്യാപിച്ചിരിക്കുകയാണെന്നും രാജി വച്ച നടിമാർ ആരോപിച്ചു. അമ്മയുടെ ജനറൽ ബോഡിയിൽ അജണ്ടയിൽ ഇല്ലാതിരുന്ന ഈ വിഷയം ചർച്ചക്കെടുത്ത് നാടകീയമായി തിരിച്ചെടുക്കാൻ തീരുമാനിച്ചത് ഞെട്ടലോടെയാണ് മാധ്യമങ്ങളിൽ നിന്ന് അറിഞ്ഞത്. തങ്ങൾക്ക് ഈ മീറ്റിങ്ങിൽ പങ്കെടുക്കാൻ സാധിച്ചില്ല എന്നത് ഈ പ്രവൃത്തിയെ സാധൂകരിക്കുന്നില്ല. ഈ തീരുമാനമെടുക്കുമ്പോൾ, ആക്രമണത്തെ അതിജീവിച്ച അംഗത്തെ നിങ്ങൾ ഓർത്തില്ല! അമ്മയുടെ ഈ തീരുമാനത്തിനൊപ്പം നിൽക്കാൻ തങ്ങൾക്കാവില്ലെന്നും അവളുടെ പോരാട്ടത്തിന് കൂടുതൽ ശക്തമായി ഐക്യദാർഢ്യം പ്രഖ്യാപിക്കുന്നുവെന്നും രമ്യയും ഗീതുവും റീമയും അറിയിച്ചു. തങ്ങളുടെ രാജി അമ്മ ഇപ്പോഴെടുത്ത തീരുമാനം തിരുത്തുന്നതിന് കാരണമാകട്ടെ എന്ന ആശ അവർ പ്രകടിപ്പിച്ചു. .

രമ്യാ നമ്പീശൻ ഇങ്ങനെ കുറിച്ചു :"അമ്മ" യിൽ നിന്നും രാജി വെക്കുകയാണ് . ഇപ്പോഴത്തെ സാഹചര്യങ്ങളോടുള്ള അങ്ങേയറ്റം നിരുത്തരവാദപരമായ നിലപാടിൽ പ്രതിഷേധിച്ചാണ് എന്റെ രാജി . ഹീനമായ ആക്രമണം നേരിട്ട ,ഞങ്ങളുടെ സഹപ്രവർത്തകയോട് തികച്ചും വഞ്ചനാപരവും മനുഷ്യത്വഹീനവുമായ നിലപാടാണ് സംഘടന സ്വീകരിച്ചത് . ഞാൻ പ്രാഥമികമായി മനുഷ്യനായിരിക്കുന്നതിൽ വിശ്വസിക്കുന്നു. നീതി പുലരട്ടെ.

ഗീതു മോഹൻദാസിന്റെ വാക്കുകൾ : "അമ്മ"യിൽ നിന്ന് ഞാൻ രാജി വെക്കുകയാണ് . വളരെ നേരത്തെ എടുക്കേണ്ട തീരുമാനമായിരുന്നു ഇത്‌. അമ്മയക്കകത്തു നിന്നു കൊണ്ട് അവരുടെ തീരുമാനങ്ങളെ ചോദ്യം ചെയ്യുന്നത് ഏറെ പ്രയാസമാണ് എന്ന് മുൻ നിർവ്വാഹക സമിതി അംഗം എന്ന നിലയിൽ ഞാൻ മനസ്സിലാക്കിയിട്ടുള്ളതാണ്. നേതൃത്വത്തിന്റെ അഭിപ്രായങ്ങളെ ചോദ്യം ചെയ്യാതെ അനുസരിക്കുന്ന അംഗങ്ങളെയാണ് ഈ സംഘടനക്ക് വേണ്ടത് . ഞങ്ങളുടെയെല്ലാം ശബ്ദം അവിടെ മുങ്ങിപ്പോകുകയാണ് . ഇനിയും അതനുവദിക്കാൻ കഴിയില്ല . എന്റെ കൂട്ടുകാരിക്കൊപ്പം നിന്നുകൊണ്ട് അമ്മ എന്ന സംഘടനയുടെ തീർത്തും ഉത്തരവാദിത്വമില്ലാത്ത ഇത്തരം നിലപാടുകൾക്കെതിരെ ഞാൻ പുറത്തു നിന്നു പോരാടും.

ഇപ്പോൾ സംഭവിച്ചത് ഒരാളിലോ ഒരു സംഘടനയിലോ ഒതുങ്ങുന്ന ഒരു പ്രശ്നമാണെന്ന് കരുതുന്നില്ലെന്നും  ഈ ഒരൊറ്റ പ്രശ്നത്തിന്റെ പേരിലല്ല താൻ "അമ്മ" വിടുന്നതെന്നും റീമ കല്ലിങ്കൽ കുറിച്ചു. അടുത്ത തലമുറയ്ക്ക് സ്വന്തം തൊഴിലിടത്തിൽ ഒത്തുതീർപ്പുകളില്ലാതെ, ആത്മാഭിനത്തോടെ തുടരാനുള്ള കരുത്തുണ്ടാവണമെന്ന ആഗ്രഹം കൊണ്ട് കൂടിയാണ് അമ്മയിൽനിന്ന് പുറത്തുപോകുന്നതെന്ന് റീമ പറഞ്ഞു.