പോപ്പുലർ ഫ്രണ്ട് കൊടുംക്രിമിനലുകളായ ഭീകരസംഘം : തോമസ് ഐസക്ക്

#

(04.07.2018) : യാതൊരു ജനാധിപത്യവിനിമയത്തിനും യോഗ്യതയില്ലാത്ത ക്രിമിനൽ സംഘമാണ് പോപ്പുലർ ഫ്രണ്ടെന്ന് മന്ത്രി തോമസ് ഐസക്ക്. തങ്ങളെ മതതീവ്രവാദികളെന്ന് ആക്ഷേപിക്കുന്നുവെന്ന എസ്ഡിപിഐക്കാരുടെ പരാതിയെ ഐസക്ക് പുച്ഛിച്ചുതള്ളി. പോപ്പുലർ ഫ്രണ്ടും എസ്ഡിപിഐയും മതതീവ്രവാദികൾ തന്നെയാണെന്ന് ദേശാഭിമാനിയിലെഴുതിയ ലേഖനത്തിൽ ഐസക്ക് പറഞ്ഞു. മതത്തിന്റെ പേരിലാണ് അവരുടെ അഭിനയം. മതത്തിന്റെ പേരിൽത്തന്നെയാണവർ കത്തി രാകുന്നത്. മതത്തിന്റെ പേരിൽത്തന്നെയാണവർ ഭീഷണി മുഴക്കുന്നത്. വിനോദയാത്ര പോകുമ്പോഴും കുട്ടികൾക്ക് യൂണിഫോം നിശ്ചയിക്കുമ്പോഴും കാമ്പസ് ഫ്രണ്ടുകാർ കലാലയങ്ങളിൽ അഴിഞ്ഞാടാനെത്തുന്നത് മതത്തിന്റെ പേരിൽത്തന്നെയാണ്. അങ്ങനെയുള്ളവരെ മതതീവ്രവാദികളെന്നല്ലാതെ മറ്റെന്താണ് വിളിക്കേണ്ടത്?

കേരളത്തിലെ മതന്യൂനപക്ഷങ്ങളുടെ താൽപര്യം സംരക്ഷിക്കാൻ ഐഎസ് കൊലയാളികളുടെ സഹായം വേണ്ട. നൂറ്റാണ്ടുകളായി കേരളത്തിൽ ന്യൂനപക്ഷം സുരക്ഷിതരായി ജീവിച്ചത് ഇവരുടെ സഹായമില്ലാതെ തന്നെയാണ്. ഇനിയും അങ്ങനെതന്നെ ജീവിക്കും. മാത്രമല്ല, ഈ തീവ്രവാദ കൊലയാളി സംഘങ്ങളെ പാടേ തള്ളിക്കളഞ്ഞുകൊണ്ടാണ് കേരളത്തിലെ മതന്യൂനപക്ഷങ്ങൾ സമൂഹത്തിന്റെ മുഖ്യധാരയുടെ മുൻനിരയിൽ കടന്നിരുന്നത്.

കൊടുംക്രിമിനലുകളായ ഈ ഭീകരസംഘത്തെ എല്ലാത്തരം സാമൂഹ്യവിനിമയങ്ങളിൽ നിന്നും അകറ്റി നിർത്താൻ സമൂഹം ഒറ്റക്കെട്ടായി രംഗത്തിറങ്ങണമെന്ന് ലേഖനത്തിൽ ഐസക്ക് ആവശ്യപ്പെട്ടു. സൌഹാർദ്ദ മനോഭാവത്തോടെയുള്ള ഒരു പുഞ്ചിരിയ്ക്കുപോലും ഇവറ്റകൾക്ക് അർഹതയില്ല. എസ്ഡിപിഐയുടെയും പോപ്പുലർ ഫ്രണ്ടിന്റെയും സാമൂഹ്യബഹിഷ്കരണമാണ് അഭിമന്യു എന്ന നിരപരാധിയുടെ രക്തസാക്ഷിത്വം കേരളസമൂഹത്തോട് ആഹ്വാനം ചെയ്യുന്നതെന്ന് പറഞ്ഞുകൊണ്ടാണ് ലേഖനം അവസാനിപ്പിക്കുന്നത്.